Edito : «Zanaka amin'ny Ray amandreny...»

            Anio isika dia hiresaka adidy sy andraikitra eo amin'ny ray aman-dreny sy ny zanaka. Zava-dehibe ny mahafantatra izany hampirindra tsara ny fifandraisana eo amin'ny fiaraha-monina, ialana amin'ny fanakorontanana na ny fifandirana amin'izay adidy sy andraikitra mifandrify ny tsirairay avy ary indrindra indrindra hanamafy ombieny ny fifankatiavan'ny ankohonanana iray na hampitombo ny fifanajana sy ny fifaliana eo amin'ny fianakaviana iray. Andeha horesahina ny 

       1. Ny adidin'ny ray aman-dreny amin'ny zanaka
       2. Ny adidin'ny zanaka amin'ny ray aman-dreny

            2. Ny Adidin'ny zanaka amin'ny ray aman-dreny
      Tsy mitovy ny adidin'ny ray aman-dreny sy ny zanaka fa mifampiankina sy mifampitaiza. Ny adidin'ny zanaka voalohany amin'ny ray aman-dreniny dia izay efa nambara an'Andriamanitra ao amin'ny Didy Folo manao hoe : " Manajà ny rainao sy ny reninao, araka izay nandidian'i Jehovah Andriamanitrao, mba ho maro andro ianao ary mba hahita soa any amin'ny tany omen'i Jehovah Andriamanitrao anao." Deotoroniomia 5:16.
      Mafonja tokoa ny nambaran'Andriamanitra eto. Adidin'ny zanaka voalohany indrindra tokoa ny manaja ny loharano nipoirany. Izay zanaka sahy manevateva ray aman-dreny na manao tsinontsinona ray aman-dreny dia tsy hahita soa eto amin'ny tany ity. Hajao ny ray aman-dreny, omeo voninahitra, omeo fifaliana, omeo fanambinana dia hirotsaka aminao ny andon'ny tany ! Aza omena alahelo ny ray aman-dreny fa ireny no loharano nipoirana, ireny no nahita masoandro, ireny no naha-olona anao !....
     Ny adidin'ny zanaka amin'ny ray aman-dreny koa dia ny FITIAVANA. Manana adidy ny zanaka hitia ireo loharano nipoirany. Ny fifankatiavan'ny ray aman-dreny sy ny zanaka no hanamafy ny fifaliana sy hampijoro ny fifanajana. Ny zavatra tsy misy fitiavana dia tsarovy hatrany fa miteraka ady, fikorontanana, fialonana, fanesoana, fanambaniana. Adidin'ny zanaka ny mitia hanjakan'ny fahasambaran'ny fianakaviana.